បុរសម្នាក់ត្រូវគេវាយរបួសធ្ងន់ត្រូវនគរបាលចុះល្បាតឃើញដឹកយកទៅសង្គ្រោះនៅមន្ទីរពេទ្យ
29-January-2020 | ដោយ ពលមនសិការ
កណ្ដាល៖ នគរបាលស្រុកខ្សាច់កណ្ដាល ចុះល្បាតការពារសុវត្ថិភាពជូនប្រជាពលរដ្ឋក្នុងមូលដ្ឋាន បានជួបបុរសម្នាក់ត្រូវជនសង្ស័យមិនស្គាល់អត្តសញ្ញាណវាយបណ្ដាលឲ្យរងរបួសធ្ងន់ ។ ភ្លាមៗនោះដែរ កម្លាំងសមត្ថកិច្ចក៏ធ្វើការដឹកជនរងគ្រោះទៅព្យាបាលនៅមន្ទីរពេទ្យទាន់ពេលផងដែរ។
ករណីនេះ កើតឡើងកាលពីថ្ងៃទី២៨ ខែមករា ឆ្នាំ២០២០ វេលាម៉ោង ២៣និង៣០នាទី ស្ថិតក្នុងភូមិពុកឬស្សីកណ្តាល ឃុំពុកឬស្សី ស្រុកខ្សាច់កណ្ដាល ខេត្តកណ្ដាល។
មន្ត្រីនគរបាលស្រុកខ្សាច់កណ្ដាលបានឲ្យដឹងថា ជនរងគ្រោះឈ្មោះ ខាត់ ចំរើន ភេទប្រុស អាយុ៣៧ឆ្នាំ ជនជាតិខ្មែរ មុខរបរ កសិករ មានទីលំនៅភូមិព្រែកថោង ឃុំព្រែកលួង ស្រុកខ្សាច់កណ្តាល ខេត្តកណ្ដាល (របួសស្មា២ កន្លែង ករដៃ១កន្លែង ក្បាលផ្នែកខាងក្រោយ១កន្លែង។ ចំណែកជនសង្ស័យពុំស្គាល់អត្តសញ្ញាណ។
ប្រភពដដែលបន្តថា នៅមុនពេលកើតហេតុ កម្លាំងសមត្ថកិច្ច បានធ្វើការចុះល្បាតការពាររក្សាសន្តិសុខជូនប្រជាពលរដ្ឋ លុះមកដល់ចំណុចកើតហេតុ ក៏ប្រទះឃើញជនរងគ្រោះដេកនៅលើដី ដោយមានរបួសស្នាម៣ទៅ៤កន្លែងលើដងខ្លួន ដោយត្រូវជនសង្ស័យវាយជាមួយនឹងវត្ថុរឹង ។ ភ្លាមៗនោះ ក៏យកជនរងគ្រោះទៅសង្គ្រោះនៅរាជធានីភ្នំពេញ ។
បច្ចុប្បន្ន ករណីនេះ សមត្ថកិច្ចជំនាញកំពុងកសាងសំណុំរឿង ដើម្បីស្រាវជ្រាវរកជនសង្ស័យមកអនុវត្តន៏ចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ6491
- ម្សិលមិញ15681
- សប្តាហ៍នេះ65331
- ខែនេះ87211
- ឆ្នាំនេះ87211
- សរុប20529667